Geologia e paleontologia
L'exposiziun al segund plaun sura mussa, co ch'ils grips sa furman e svaneschan puspè. En cumbinaziun cun il clima, cun l'aua, cun ils glatschers e cun l'erosiun resulta uschia ina transfurmaziun permanenta da las Alps. Ina paraid-crap impressiunanta mussa l'impurtanza da talas structuras per ils animals. Fossils e fastizs da saurs ch'èn milliuns onns vegls permettan in sguard en il passà, cura ch'il Grischun era ina mar tropica pauc profunda. Petrificaziuns unicas d'in saur sgulant, d'in pesch-barlocca u d'in pesch da rapina, dal qual il cuntegn dal magun è anc vesaivel suenter 240 milliuns onns, documenteschan in mund ch'è gia daditg svanì.
Minerals
Ils minerals ils pli bels dal Grischun fan valair lur furmas e lur colurs fascinantas en vitrinas generusas al plaun il pli sisum. Il quarz da fim "Jumbo" che paisa 73 kilograms fa impressiun grazia a sia grondezza. Minerals pitschens pon vegnir contemplads e classifitgads cun agid d'in binocular. Natiralmain ha er il chat dad aur il pli impurtant da la Svizra (aur da muntogna da la Val Sumvitg) survegnì qua ina plazza meritada.